أكد الاعلامى أحمد شوبير أن ممدوح عباس رئيس نادى الزمالك السابق أعلن عدم وجود حجز على أموال القلعة البيضاء ، وقال شوبير فى برنامجه الاذاعى عبر أون سبورت إف إم :” تجربة اللجنة المعينة فى الزمالك أمامها طريقين إما النجاح الباهر أو عدم التوفيق ، ولجنة الحكماء فيها أسماء ثقيلة ياريت يحطوا نظام للزمالك خلال السنة المتوقع وجودهم فيها داخل النادى”.
وتابع شوبير:”لو لجنة الكرة ولجنة الحكماء عرفوا يعملوا توازن هتكون تجربة ناجحة للغاية ، وأنا سمعت مناشدة من الدكتور كمال درويش عضو لجنة الحكماء بيطالب فيها ممدوح عباس بالتنازل عن الحجز على أموال الزمالك وكلمت ممدوح عباس الراجل فجرلى مفاجأة وقالى مفيش مليم محجوز عليه للزمالك وقول الكلام ده على لسانى”.
ويضيف شوبير:”الزمالك عنده أزمة مالية بسبب مطالبة اللاعبين بمستحقاتهم المتأخرة ومفيش أموال بنكية للزمالك والدنيا مدربكة بس لازم الفريق يرمى كل ده وراء ضهره ويركز فى التدريبات بداية من السبت المقبل ، لان الزمالك مستحيل يقع والغريب أن اللى عايزين الزمالك يقع هما زملكاوية يتغنون بحب الزمالك على الملأ وفى الباطن يطعنون النادى ، الدنيا مش معروفة هتمشى ازاى بس النادى عنده فرصة يضع نظام جديد يمشى عليه عصور ، البعض خارج يقولك احنا كنا مخلصين صفقة رجب بكار وصفقة دونجا وغيرهم وغيرهم وواضح ان المسألة كلام فقط “.
