كشف والد الطفل محمد الريدى الذى لاقى مصرعه غرقاً فى حمام السباحة بنادى الزمالك تفاصيل واقعة وفاة نجله وسبب اتخاذ الاجراءات القانونية ضد القلعة البيضاء ، وقال الريدى فى مداخلة هاتفية مع برنامج ساعة مع شوبير عبر أذاعة أون سبورت إف إم :”سأحكى الواقعة بمنتهى الوضوح ، أنا عضو فى نادى الزمالك لم تمر على عضويتى سنة ، قررت عمل عضوية فى الزمالك حتى أساهم فى توفير جو مناسب لاولادى بنادى محترم يقضون فيه أوقات فراغهم ، وفى اليوم المشئوم كنت أجلس برفقة زوجتى عند حمام السباحة نتابع ولادى الاثنين، وعشت ساعة تساوى 100 الف سنة”
ويضيف الريدى :”قررت الذهاب لأداء صلاة العشاء وطلبت من زوجتى متابعة الاولاد فى حمام السباحة فلقد كنا نتابعهم طوال ساعتين وقررت فى الساعة 7.45 الذهاب للصلاة والتقطت لهم بعض الصور وذهبت للمسجد فوجئت بانقطاع المياة فعدت ولم أجد إبنى محمد “4 سنوات” الامر لم يتعدى خمس دقايق ، سألت الاولاد اللى مكلفين بمتابعة الناس فى حمام السباحة وعمرهم لايتجاوز عشرين عاماً ووجدهم غير مهتمين بالأمر وقالولى روح دور عليه فى صالة البلاى ستيشن عند مكتب المستشار”.
وتابع الريدى:”أنا للوهلة الاولى فكرت ان ابنى اتخطف روحت عند صالة البلاى ستيشن وقولت للموظف اللى هناك ابنى ضايع قول فى الميكروفون اسمه قالى مينفعش المستشار معاه مؤتمر ولو سمع هيسحب منك الكارنيه قولتله ليه انتو مش هتخسروا حاجة انده على الولد ولكن محدش سمعنى ولقيته بعدها ميت فى حمام السباحة”
وأكمل الريدى:”احنا من أسوان وأنا عايز اربى عيالى مش عايز مشاكل قولت هسكت وهسامح وده قضاء ربنا واحنا راضيين رغم ان حالتى وحالة أمه صعبة جدا ، ولكن اللى استفزنى أن المستشار طالع يقول أنى كنت بتمشى فى النادى وسايب ابنى وأمه هيتجمد عضويتها عشان قصرت فى حق ابنها ، تصريحات استفزنى وخلتنى اقرر مسكتش”.
وتابع :”الزمالك كان سبب فى وفاة ابنى بسبب اهمال الموظفين ، راعيت ابنى ساعتين وفشلوا يراعوه خمس دقائق ، بتعذبونا ليه ، عضوية ايه اللى هفكر فيها ياسيادة المستشار ، انت فاكر انى ممكن أدخل النادى اللى ابنى غرق فيه تانى ، انا استعوضت ربنا فى فلوس العضوية وياريتنى ماعملتها اساساً ، انا عندى ولاد وعايز اربيهم ومش عايز مشكلة مع مرتضى منصور ”
وأوضح :”بعتلى ناس من طرفه النائب بتاعه وحد تانى مش بفتكر الاسماء ، قالوا هنيجى نعزى قولت اهلا وسهلا ، وجم فعلا وقالولى محدش من عندك يتكلم فى حاجة تانى ، قولتلهم ارحمونى انا مش عايز ادخل فى مشاكل تانى ، أنا عايز اعيش فى هدوء ، وقررت اتخذ الاجراءات القانونية ضد النادى عشان حق ابنى اللى اتعذب قبل مايموت ، وبقول لمرتضى منصور أرجوك لم الناس بتوعك وسيبونا فى حالنا احنا تعبانين “.
