أكد الإعلامى أحمد شوبير، حارس مرمى النادى الأهلى ومنتخب مصر السابق، أن هناك بعض الأندية ستعود للتدريبات، ومدرب مستقيل سيعود لممارسة عمله بعد إعلان الاتحاد الأفريقى الكاف مواعيد نصف نهائى دورى الأبطال الأفريقى، وقال شوبير فى برنامجه الإذاعى عبر أون سبورت، “سمعت أن فى مدرب استقال عشان خايف من كورونا، مع أن اللى أعرفه أنه مقبضش من 4 أشهر مش عشان كورونا ولا حاجة، ولو الكاف أعلن يوم الأحد مواعيد مباريات نصف النهائى وإن المباريات سوف تلعب فى أغسطس، سيعود المدرب لعمله وسيعود النادى لتدريباته ليستعد فوراً دون اعتراض، وهيرجع يقول أصلهم ماتشين ياكابتن مش كتير ولو الكأس رجع هيلعبوا أصلهم ماتشات قليلة بردو، إنما الدورى لأ مينفعش”.
وأضاف شوبير : “والناس ترجع تقولى أنت عايز الأهلى ياخد الدورى، دورى أيه ده الأهلى عنده 41 بطولة، ياجدعان أنا بتكلم عن صناعة بتحتضر مع إلغاء الدوريات بشكل متتالى وبدون داعى، والناس اللى بتقول نلغى الدورى الجديد بردو لأ، ممكن نكمل الدورى القديم ونلعب الجديد بكثير من النظام وببعض التضحيات “.
وتابع حارس الأهلى السابق، “ياجماعة فى رئيس نادى قاعد فى بيته بيقول للأندية فى القسم الثانى مين عايز يصعد وأنا هصعده ومين عايز حاجة فى نظام الصعود هنعملها ليه”.
