نتعرف اليوم على فنانة أبدعت وتألقت فى فن السيراميك، فقد صنعت منه تحف فنية راقية ورائعة، بتصميمات عصرية ومناسبة لجميع الأذواق، (نور الهدي) واسمها الحقيقي (هند) وهي من سكان محافظة الجيزة، ذات الموهبة المميزة صنعت مصغرات من جميع الأدوات التى نستخدمها، فقد صنعت مصغرات من غرف النوم والمطابخ والعديد من التحف الفنية التى أبدعت فيها، وفى السطور القليلة القادمة سوف نتعرف على فنانة ومبدعة فى فن السيراميك.
ما هو الاسم الذي تفضلينه اسمك الحقيقي أم اسم الشهرة؟
اسمي هند وشهرتي نور بحب اسم نور لانه اسم امي.
وهل أصبحت الهواية احتراف أم لا؟
في البداية كانت هواية، ثم بعد ذلك وصلت الحمد لله لحد العمل هو مش قوي بس الحمد لله احسن من الاول.
منذ متي وأنت تمارسين هوايتك؟
انا بمارس هوايتي دي بقالي اكثر من عشر سنين.
ما هى أنواع الفنون والهوايات التى تجيدينها؟ وما هي الهواية التي تميزتي فيها؟
اتعلقت بعجينة السيراميك وحبيتها وكمان اشتغلت تطريز بالخيوط وتطريز بالستان وفي الاخر عشقت شغل المصغرات وغالبا أدخلت فيه كل ما عرفته من فنون يدويه.
متى بدأت معرفتك بفنون السيراميك؟
بداية معرفتي بالسيراميك كانت من حوالي ثمان سنين، بحثت وعرفت كل اسرارها والحمد لله أتقنته.
هل حاولتي العمل أو المشاركة فى معارض لفنونن المصغرات فى السيراميك؟
حاولت طبعا اشترك في معارض كثير، بس اخيرا اشتركت في معرض واحد فقط وده لسبب عدم تواجدي الدائم بمصر.
هل تقومين بتصميم منتجاتك بنفسك أم لا؟
اكيد بصمم لنفسي حاجات كتير من ضمنها مثلا بعمل اكسيسوري من عجينه السيراميك خاص بي وكمان ممكن اعمل ديكورات منزليه بسيطه للأركان.
ما هى المعوقات التى تواجهك فى الوقت الحالي؟
اكثر معوق واجهني هو ان الناس مش بتقدر الشغل اليدوي خاااالص وبتستقل بالشغل ده كثير جدا، كمان الحاجه اللي بتواجهنا كلنا هي الخامات والادوات اللي غير متوفرة بشكل كبير، لكن الى حد بنحاول نتصرف ونشغل نفسنا.
ما هو حلمك وأمنياتك التي تتمنى تحقيقها بالنسبة لفن السيراميك؟
اتمنى انها تنتشر وستات كتير يعرفوها ساعتها مش هيفكرو يشتروا اي حاجه من بره بل بالعكس هم هيعملوها بنفسهم.
ما هو رايك فى فنون الهاند ميد المتعددة وايه اقتراحاتك اللى نفسك تتنفذ للنهوض بجميع فنون الهاند ميد؟
والله رايي في فنون الهاند مين أنه يوجد فنون كثيرة مش واخده حقها خالص في مصر ونفسي يكون في (نقابة الأشغال اليدوية) مثلا ترعاهم وكمان تحاول تصدر منتجهم احنا عندنا كفاءات ممكن نستفيد منها كتير.. وتستحق الاهتمام.
ما سبب حبك واختيارك لفن السيراميك وخصوصا المصغرات؟ هل هو صعب ام سهل؟
سبب حبي لفن السيراميك لانه خامه سحرية فعلا ممكن تحقق كل اللي انا عاوزاه، وبحب قوي المصغرات لانها بتوصلني لعالم ثاني خالص بعيش جواها حقيقي وابقى مبسوطه وانا بعمل منمنمات صغيرة الناس كلها بتبقى مبسوطه بيها وده بيسعدني.
وبالنسبة لفن السيراميك هو مش صعب ومش سهل اي حد بيحب شيء اكيد هيشوف وسهلا واللي عايز يتعلم بيشوفه سهل، وكان يعوقني عدم وجود بمصر الدائم، وفى الفترة الأخيرة تواجدت والحمد لله بصورة مستمرة فتحولت الهواية إلى عمل.
