والدة أول طفل مصري يولد بدون أنف: أول ما شوفت محمد اتمنيت إني أموت ونفسي وزارة التضامن تشوف حقه

والدة أول طفل مصري يولد بدون أنف: أول ما شوفت محمد اتمنيت إني أموت ونفسي وزارة التضامن تشوف حقه
محمد أحمد أول طفل مصري يولد بدون أنف 
https://www.sba7egypt.com/?p=174770
فاطمة عبدالحميد
موقع صباح مصر
فاطمة عبدالحميد

محمد نعمة من ربنا أنا وباباه حافظنا وهنفضل نحافظ عليها لآخر يوم من عمرنا

 النفس والرضاعة أكتر الصعوبات اللي قابلتني في بداية التعامل مع محمد

ربنا غيرني من ضعف لقوة عشان خاطر محمد 

نفسي محمد يحفظ كتاب ربنا

 

محمد أحمد أول طفل مصري يولد بدون أنف، أو كما يطلق عليه الطفل المعجزة، حالة نادرة من نوعها، تحدث وسط كل 200 مليون شخص، أول حالة من نوعها في مصر والشرق الأوسط، حيث ولد محمد كفيف وبدون أنف أو تجويف أنفي يتمكن من إجراء جراحة به لكي يستطيع التنفس، لمع اسمه خلال الأيام الماضية وسط الموديل كيدز، حيث أصبح موديلز لعدد من أشهر براندات الأطفال.

 

 

حرص موقع صباح مصر على اكتشاف عالم الطفل المعجزة بصورة أكبر، والتعرف على حياته اليومية عن قرب وكيف تسير، لذا تواصلنا مع السيدة سلوى علي، والدة محمد من خلال حوار صحفي، لنتعرف منها على طبيعة حالة محمد وظروفه، وكيف تمكنت والدته من الوصول به إلى تلك المرحلة الهامة، وما هي الخطوات القادمة من حياته، وكان الحوار كالتالي:

 

محمد أحمد أول طفل مصري يولد بدون أنف 

محمد أحمد أول طفل مصري يولد بدون أنف

 

كيف كان شعورك عندما رأيتي محمد بعد ولادته مباشرة ؟

 

كنت هموت قلبي وقف، أنا حتى مشوفتش ملامحه، كل وشه كان متغطي بـ إستيكر ومشوفتش أي ملامح من وشه خالص، خوفت واتخضيت طبعاً على ابني، بجد إحساس صعب جداً ميتوصفش، الدموع نزلت لوحدها وايدي تلجت ومش فاهمة ولا عارفة أصدق ولا استوعب أي اللي بيحصل.

 

ما هي الصعوبات التي واجهتك في بداية التعامل مع محمد ؟

 

النفس والرضاعة .. أنا كان مطلوب مني أرضع محمد كل ساعتين وأدخل خرطوم من بوقه لحد معدته عشان ياكل وأنا مش ممرضة ولا فاهمة أصلا ازاي هعمل كده، لكن باباه ساعدني وجابلي ممرضة في البيت تعلمني، وتعبت جداً لحد ما قدرت أتعلم وأعرف أتعامل معاه ازاي، صعوبات كتير جداً، أقل حق ليه عليا مش قادرة أعمله  وهو إني حتى أرضعه، وفي الآخر اقتنعت بكلام باباه، لما قالي ده ابنك محدش هيتعامل معاه ولا يتحمله غيرك، انتي كل حاجة دلوقتي، وفعلا اتعاملت مع محمد بأمومتي، والحمد لله ربنا كرمني ومحمد عاش بفضل ربنا وإصراري أنا وباباه.

 

الإحباط كمان كان أكتر الصعوبات اللي تعبتني وتعبت باباه نفسياً جداً، مجرد إن اللي حواليا يقولولي انتي بتعذيبه شيلي الجهاز منه خليه يرتاح، إحساس قاتل مش قادرة أوصفه مهما اتكلمت

 

لكن رغم كل الصعوبات دي، إلا إن ربنا كريم جداً، وحنين جدا، كفاية إنه طبطب عليا بابني الصغير عُدي،وسبحان الله اتولد في نفس توقيت محمد بالضبط، كأن ربنا بيجبر بخاطري ويراضيني، وإن شاء الله ربنا يكمل معايا ويعوضني فيه خير وأقدر أوصل لعلاج لحالته.

 

ما هو تشخيص الأطباء لحالة محمد ؟

 

حالة محمد طبياً اسمها Arhinia، ودي حالة نادرة جداً، بتحصل لواحد من كل مائتي مليون، ومحمد هو الحالة  الأولى من نوعها على مستوى الشرق الأوسط كله، والدكاترة قالوا منعرفش أسبابها أي، حتى أنا وجوزي مش قرايب خالص، وكنت كل ما اروح لدكتور يقولي مش عارف ايه ده، لدرجة إن الدكاترة كانوا بيتخضوا لما اروحلهم ويشوفوا محمد.

 

محمد أحمد أول طفل مصري يولد بدون أنف 

محمد أحمد أول طفل مصري يولد بدون أنف

 

 

هل محمد يأكل طبيعي الآن ؟

 

لا، محمد معندوش أسنان عشان يمضغ الأكل، أنا لازم أهرس الأكل أوي أو أضربه في الخلاط عشان يعرف يبلعوا.

 

هل تمنيتي الموت لمحمد عند رؤيتك له بتلك الحالة  كما تمنى الآخرون؟

 

لاء، اتمنيت إن أنا اللي أموت، حسيت إني عايزة أهرب من الخضة، حسيت إني ضعيفة ومش عارفه استوعب حالته، لكن سبحان الله رغم ضعفي ده إحساس أمومتي قواني، وقاوحت وكملت مع إني في الطبيعة ضعيفة جداً، وبتهز من أقل شيء بس مع محمد حسيت إني مرأة حديدية، ربنا سبحانه وتعالى قواني وغيرني من حال لحال عشان خاطر محمد.

 

من أكثر شخص دعمك خلال مشوارك مع محمد ؟

 

جوزي طبعاً، لأن كان ليه اختيار أننا نخوض  المغامرة ونكمل، كل اللي حوالينا قالوا شيلوا الجهاز وارحموه وارحموا نفسكم، لكن مقدرناش وجوزي قال مستحيل، أنا مش ربنا عشان انهي حياة بني ادم، وكملنا مع ابننا والحمدلله قدرنا وربنا قوانا، محمد مولود كمان بثقب في القلب، لكن التئم لوحده سبحان الله، محمد نعمة من ربنا انا وباباه حافظنا وهنفضل نحافظ عليها لآخر يوم من عمرنا، ويتمنى ربنا يكرمنا فيه ويقوينا لآخر وقت

 

كيف أصبح محمد موديل كيدز ؟

 

والله الموضوع صدفة جداً، كان فيه بيدج عاملة مسابقة للأطفال الملايكة، اللي عندهم قدرات خاصة يعني، وفي حد من الأصدقاء عملي منشن، ودخلت رفعت صورة محمد وسبحان الله أخد تصويت جامد جداً وكسب المسابقة، وأنا بالفعل متعودة ألبسه كمان من ماركة سدرة على طول هو وٱخواته، وصاحبة المصنع بعدها اختارته فعلا يكون موديلز للمصنع وكل اللي شاف صوره حبها جداً.

 

هل كنت تشعرين بالحرج في بداية ظهورك مع محمد؟

 

جداً، وده بسبب ردود الأفعال اللي كانت بتموتني، الناس كانت نظرتها وتعبيرات وشها بتقتلني، مرة واحدة شافته قالت أستغفر الله العظيم يارب، كسروا بخاطري كتير جداً، كنت ببكي وأقول يارب تجبرني بحق كسرة قلبي فيه، ويارب أفضل معاه لآخر وقت وأوصله لأعلي مكان ممكن يوصل ليه.

 

محمد أحمد أول طفل مصري يولد بدون أنف 

محمد أحمد أول طفل مصري يولد بدون أنف

 

 

ختاماً ما هي أمنياتك لمحمد ؟

 

بتمنى أولاً إنه يحفظ كتاب ربنا، وهو عنده كمان موهبة حلوة إن صوته جميل، عايزة أعلمه أناشيد دينية وقرآن، نفسي ربنا يجبرني فيه، وبدعمه في موضوع الموديلز ده لإنه جميل أوي بجد ونفسي يكون حاجة كبيرة جداً، وأخيراً أنا عايزة من وزارة التضامن إنها تشوف حالة محمد، إنه ياخد حقه كـ أي طفل مصري وتوفر له الحق ده بس مش عايزة أكتر من كده.

 

ما هي  متلازمة انعدام الأنف الخُلقية ؟

 

يستعرض موقع صباح مصر نبذة مختصرة عن متلازمة “congenital arhinia”، التي يعاني منها الطفل المصري محمد أحمد، وهي حالة طبية نادرة، حدثت 43 مرة فقط على مستوى العالم، منذ عام 1931، ويقول الأطباء أنّ حالة واحدة  تظهر في كل 200 مليون مولود وهو رقم كبير للغاية.

 

انعدام الأنف الخلقي يمكن أن يجعل من الصعب على الطفل الرضيع التنفس والرضاعة في نفس الوقت ومع ذلك هناك حالات لأشخاص يعانون من هذه الحالة ويصلون إلى سن الشباب والبلوغ. 

 

محمد أحمد أول طفل مصري يولد بدون أنف 

محمد أحمد أول طفل مصري يولد بدون أنف